ಅಮೃತಾತ್ಮನು ನೀನು

ಈ ದೇಹ ನೀನೆಂದು ತಿಳಿದಿರುವೆ ನೀನು

ನಿಜತಿಳಿಯಬೇಕೇನು ದೇಹವಲ್ಲವು ನೀನು||

ಶಿಶುವಾಗಿ ಜನಿಸಿ ಬೆಳೆದು ಯೌವ್ವನ ಪಡೆದು

ವೃದ್ಧಾಪ್ಯದೆಡೆಗೆ ದಿನದಿನವು ಸಾಗಿ

ಮುಪ್ಪು, ಮರಣವು ಬರಲು ನಿನಗೇಕೆ ಚಿಂತೆ?

ಹುಟ್ಟಿದಾ ದೇಹಕೆ ಅಂತ್ಯವಿದೆಯಂತೆ||

ಮೊದಲು ಬಾಲ್ಯದ ಆಟ ನಡುನಡುವೆ ಹುಡುಗಾಟ

ಯೌವ್ವನವು ಕಾಲಿಡಲು ಸಂಸಾರದಾಟ|

ಆಡಿದವನಾರು? ಆಡಿಸಿದವನಾರು?

ಆಡುವಾ ದೇಹದೊಳು ಇರುವ ನೀನಾರು?

ನೀ ಹುಟ್ಟಲಿಲ್ಲ ತಾರುಣ್ಯ ನಿನದಲ್ಲ

ವೃದ್ಧಾಪ್ಯ ಬರಲಿಲ್ಲ ಸಾವೆಂಬ ಸುಳಿವಿಲ್ಲ|

ಅಂಗಿ ಬದಲಿಸಿದಂತೆ ದೇಹ ಬದಲಿಸಿದೆ

ನೀನು ಚೈತನ್ಯವೇ ನೀನು ಅಮೃತಾತ್ಮನು ನೀನು||